الأربعاء، 29 ديسمبر 2010

بسطيلة نجمة البحر من ابتكاري



جاتني الفكرة و قلت نطبقها بهاداك شي لي كان متوفر عندي

المقادير لي استعملت

بصل مفروم ثوم مفروم فطر طري مقطع صغيرا كروفيت قطع ميرلان فطر أسود مرطب فماء مغلي شعرية صينية مرطبة فماء مغلي صلصة الصوجا
عصير نصف حامضة زيتون مقطع حامض مصير مقطع جبن موتزريلا مفروم ملح إبزار خرقوم كمون مركز طماطم زيت زيتون زبدة أصفر بيض، لوز و كاجو محمرين و مهروشين هم لي كانوا متوفرين عندي

الطريقة

سمحو لي ماصورتش المراحل الأولى ديال التحضير لأن البطارية ديا الكاميرا ماكانتش مشحونة، و كان لازم نبدا التحضير نظرا لضيق الوقت حتى شحنتها و صورت المراحل المهمة
فمقلاة كبيرة فوق النار عملت الزيت البصل الفطر حتى تشحرو و ضفت التوابل و مركز الطماطم و الكروفيت، لما نشف الخليط احتفظت بالقليل من الكروفيت و رؤوس الفطر السوداء للتزيين جانبا
قطعت الفطر الأسود فماكينة سباكيتي و ضفتو على الخليط + الشعرية الصينية بعدما صفيتها و
قطعتها


 






والمكسرات
 


وقطع الميرلان بعدما ملحتها ومررتها فالطحين و البيض و قليتها

مذاق السمك مقلي فالبسطيلة تيجي ألذ، أنا تنقليه فزيت زيتون من نوع خاص مافيهاش أي رائحة،هي لي تنستعملها بدل الزيت الرومية و بدل الزبدة فبعض الوصفات لدرجة أنني تنستعملها حتى فالتخلاط ديال سلو و فالحلويات لأنني ماتندخلش نهائيا الزيت الرومية لظروف صحية ها هي ذي صورتها

إيلا لقيتوها تتباع عندكم جربوها راه حتى الثمن ديالها أرخص من زيت الزيتون العادية ديال الأكل و زدت الجبن مفروم و خلطت الحشوة و خليتها جانبا حتى حضرت الورقة

و بدأت التجربة:
خلطت شوية الزبدة مع زيت الزيتون المعلومة، و دهنت بهم ورقة بسطيلة، حطيت فوقها ورقة أخرى دهنتها بنفس الخليط أيضا
وحطيت الحشوة على شكل مثلث، غلفتو بالورقة الأولى



ثم عاودت جمعتو بالورقة الثانية، و حاولت نعطيه شكل مثلث ذو زاوية حادة، دهنت صينية الفرن جيدا بزيت الزيتون و ووضعت فطرفها المثلث الطوية للتحت و حاولت نميلو شوية من جهة الزاوية الحادة

عملت أربع مثلثات أخرى بنفس الطريقة، و بسيطلة صغيرة عادية وضعتها فالوسط باش عطاوني شكل نجمة البحر,و دهنت الملاقيات كلهم بأصفر البيض
,و خلطت ما تبقى من أصفر البيض مع ما تبقى من خليط الزيت و الزبدة و دهنت به النجمة كلها


ثم دوزت شوية الورقة فآلة سباكيتي ثم قطعتها رقيقة بالمقص يعني حبيبات رشيت بهم النجمة كلها و حاولت نضغط شوية بيدي ودخلتها لفرن 170 درجة حتى تحمرت على خاطرها, و لما خرجتها اكتشفت أنها تطرطقات شوية من بعض الأماكن


تنظن الحشوة كانت كثيرة, يعني كان من المفروض نقلل شوية من الحشوة و نزيد ورقة ثالثة فاللف، و مانزيرهاش بزاف نخلي للجبن فين يسيح
المهم, قلبتها فصينية أخرى، ثم عاودت قلبتها فطبق التقديم، كان ممكن نتفادى هاد العملية لو كان عندي طبق تقديم تيدخل للفرن، كاين و لكن صغير ماتساعلهاش
رشيت عليها الجبن و زينتها باش نستر ما ستر الله ههههه
و قدمتها لراجلي وولدي آدم لي كان مبرزطني
مني كنت تنصاوب فيها و شاف الشكل ديالها و هو تيقول لي ماما بغيت ناكل توينكل توينكل ليتل ستار و تيكملي الأغنية كلها ههههه


ملاحظة: الجميل فهاد البسطيلة من غير الشكل و المذاق هو سهولة تقسيمها: ما تتحتاجش تقطع و تفتت راكم تتعرفوا هداك المنظر، الأطراف تيتسحبوا بسهولة لأنهم ملاقيين غير بأصفر البيض، و أيضا يمكن عمل أطراف أكثر على حسب عدد الأفراد
لا تنسوني و أهل بيتي من صالح دعائكم بصلاح الدين و الدنيا و الآخرة



هناك تعليق واحد:

  1. الله يعطيك الصحة..وهادي أول مرة كانشوف هاد الطريقة وعجباتني بزاف
    شكرا بزااف والله يخلي ليك ادم وباباه

    ردحذف