الخميس، 30 ديسمبر، 2010

طاجين الدجاج بنكهة السمك




صدور دجاج منزوع منها الجلد و منظفة بالماء ثم الملح و الحامض جيدا
ملح( نقللو شوية على حساب الحامض مصير و الزيتون و معجون الطماطم)
توابل السمك:
إبزار
سكين جبير
فلفل أحمر حلو مطحون/ بابريكا
فلفل حار/سودانية /اختيارية
كمون مطحون
شوية خرقوم طبيعي مطحون
قزبور يابس مطحون
عصير حامض
ثوم شوية مدقوق و شوية كامل
قزبور و معدنوس مقطعين رقاق
زيت زيتون
جزر
بطاطس
فلفل حلو
فلفل حار/ اختياري
طماطم طرية
القليل من معجون الطماطم
زيتون أخضر
حامض مرقد
قشرة طماطم و فلفلة خضراء حلوة طرية للتزيين /اختياري



الطريقة

في إناء كبير و غارق نخلطو عصير الحامض مع التوابل و الثوم مدقوق و القزبور و المعدنوس و القليل من الماء حتى نحصل على شبه عجينة جارية نرقدو فيها قطع الدجاج جيدا و نغطيوهم و ندخلوهم للثلاجة على الأقل ساعتين من الأحسن ليلة كاملة ندهنو الطجين بمقدار من زيت الزيتون و نرصو فيه قطع الدجاج ثم الخضر حسب الذوق و المنظر اللي يعجبنا ثم الثوم كامل ثم الزيتون و الحامض المرقد طبعا.





ثم نأخذ ما تبقى من الصلصة اللي رقدنا فيها قطع الدجاج نزيدو عليها معجون الطماطم و القياس ديال الماء نحركو جيدا حتى ينسجم الخليط و نصبوها بشوية فوق الخضر ثم زيت الزيتون .
طبعا بلا ما نحتاج نقول لكم أن أحسن طريقة يطيب عليها الطاجين هي الفحم و لكن إلا ما سمحاتش الظروف غير فوق البوطة نوضعو أولا صفيحة معدنية ثم نوضعو فوقها الطاجين ثم نشعلو النار و اللي ما عندهاش يمكن لها تعوضها بغطاء علبة الحليب الجاف الكبيرة غاديا تعطي فأول الإحتراق رائحة مزعجة من بعد ما تزول نقدرو نستعملوها كقاعدة لمنع احتراق الطاجين ديالنا .
و إلا ماكانش عندنا الوقت نغطيوه جيدا بورق الألمنيوم ثم الغطاء الخاص به ولما يغلي ننقص النار و نخليوه يطيب مع مراقبة الماء مرة مرة.
و ما ننساوش نشفوه شوية حتى توقف المريقة ديالو و تبان الزيت بوضوح قبل التقديم , نزينوه حسب الذوق أنا لفيت قشور طماطم على شكل وردة وضعتها فالوسط و قطعت عريشات من فلفل أخضر حلو زينت به جوانب الوردة و يمكن طبعا تقديمه كما هو طبيعي ما كاينش ما أحسن من الطبيعة.





وصفة تستحق التجربة فعلا و اللي ذاقها غاديا تعجبو إن شاء الله .


و بالصحة و الراحة


ليست هناك تعليقات:

إرسال تعليق