الجمعة، 31 ديسمبر، 2010

طاجين الحوت بالخضر


المقادير


قطع سمك 
مطيشة مطحونة 
معجون طماطم 
قسبور و معدنوس مقطعين رقاق 
ثوم مقطع رقيق
ملح/ إبزار/ سكين جبير/ خرقوم /تحميرة /كمون/فلفل حار حسب الذوق
زيت زيتون
حامض مصير مقطع رقيق
زيتون أخضر
بطاطس
جزر
دنجال
فلفل حلو
فلفل حار حسب الذوق
دوائر مطيشة 
دوائر حامض طري
الطريقة 

-نخلطو التوابل مع مطيشة مطحونة و معجون الطماطم و الثوم و القسبور و المعدنوس و قطع الحامض المصير و نرقدو فيهم قطع السمك لمدة ساعتين فما أكثر
-نصبو زيت الزيتون فالطاجين و نوضعو الجزر ثم البطاطس ثم الدنجال المقطعين حسب الذوق ثم قطع السمك، ثم نزينوه ببقية الخضر و نصبو فوقها ما تبقى من الشرمولة
-نوضعو الطاجين فوق نار مهيلة حتى يطيب و ينشف من المرق و يبان الزيت بوضوح و نقدموه بالصحة و الراحة



الخميس، 30 ديسمبر، 2010

شباكية الوردة بلا بيض


 





300g زبدة نخدموها بأطراف الأصابع جيدا مع كيلو طحين و كأس صغير زيت زيتون و ملعقة كبيرة سمن و رشة ملح. نتسناو10 دقائق و نضيفو كاس جلجلان نصف محمر و مطحون جيدا + كأس لوز أو كاوكاو نصف محمر و مطحون جيدا+ ملعقة كبيرة نافع و ملعقة كبيرة قرفة مطحونين و مغربلين + مسكة حرة مدقوقة مع ملعقة كبيرة سكر+ ملعقتين كبار خل + قطرتين من روح الزهر+ زعفران حر مدقوق ( إختياري) نمزج العناصر جيدا و نجمعها على شكل عجين عادي بالحليب بارد (تقريبا كأس على حسب نوع الطحين) نعملو منو كويرات نوضعوها فأكياس بلاستيك
سنبدأ على بركة الله
أولا تنورقو العجين و تقطعوه دوائر صغيرة حسب حجم الورد اللي بغينا
من بعد تاخدو دوائر و توضعوها على بعض فحال الصورة



ضغطو شوية عليهم بالأصبع من الوسط باش يسهال اللف


ثم نلفوهم من الأخيرة للأولى و نقطعو من الوسط بالسكين

غادين نحصلو على2 وريدات
نحاولو نفتحوهم شوية باش يدخلهم الطياب أثناء القليو اللي بغات تدير وسطهم شي لوزة مسلوقة يكون أحسن بالحق تحاول تدخلها مزيان حتى تثبت أنا نسيت:(

مني نكملو تشكيل الوريدات ديالنا كلهم نديرو الزيت فوق النارو العسل يدفى في حمام مريم
ومني يسخن الزيت نقصو النار شوية و نبداو نقليوالوريدات حتى يتحمرو

 
نسقطروهم و نطفيوهم في العسل الدافئ ننتظرو بعض الدقائق ثم نصفيهم من العسل ونحطوهم فكويغطات من الأحسن أنا الكويغطات اللي كانو عندي شوية كبار إلى ما كناش واضعين فيهم اللوزة نرشوهم بجلجلان محمر أو لوز مقلي و مهروش
 





ملاحظة مهمة حاولو تورقو العجين مزيان للحصول على نتيجة أحسن و بالتوفيق إن شاء الله
لا تنسوني و أهل بيتي من خالص دعائكم

ثلاث أشكال من حلوة اللوز بنفس المكونات من مطبخي بالصور


مقادير العجين

1 كلغ طحين
125 غرام زبدة
شوسة ملح
شوية مسكة حرة
ماء زهر
2 معلقتين من العسل
مقادير العقدة
كلغ لوز (نصلقوه ونقشروه ونطحنوه المرة الاولى والثانية مع 600 غرام سنيدة واللي يبغيوه حلو بزاف يعملو 750غرام سنيدة)
شوية مسكة حرة
نخلطو جميع المكونات ب 100 غرام زبدة تقريبا حسب نوعية اللوز ادا كان ناشف او ميدم
شوية ماء زهر


و أخذت شوية من العجين قسمتو على حسب الألوان لي عندي و لونت كل قسم على حدة

نبداو على بركة الله


1)
المروحة اليدوية /l`eventaille
اخدت القدر لي غادي يلزمني من العجين و العقدة (كمية العقدة نصف كمية العجين أو حسب السمك لي بغينا)


و احتفظت بالبقية فأكياس بلاستيك طلقت بالمدلك كرة من العجين بين 2 بلاستيك غذائي و نفس الشيء بالنسبة للعقدة
قطعتهم بدائرتين : العجين دائرة متوسطة كاس صغير مثلا و العقدة دائرة أصغر منها شوية فقط وقسمت دوائر العقدة نصفين بالسكين وضعت فكل دائرة عجين نصف دائرة عقدة



طويت عليه العجين على شكل نصف دائرة ضغطت عليها شوية بيدي و عملت فالوسط دائرة بواسطة غلاقة صغيرة ديال قرعة روح الزهر ثم نقشت هاد الأشكال بواسطة نتاف عادي مخصصاه للمطبخ باش نعطيها شكل مروحة يدوية
/ eventaille



ثم علمت بواسطة العجين العادي و الأخضر فحال حبات روز صغيرة و ببقية الألوان دوائر صغيرة أيضا


وضعت فكل دائرة حبة عجين بيضاء و لفيتها من جهة و حدة ولصقت فجوانبها حبتين خضر عطاني شكل وريدة صغيرة لصقتها تحت الدائرة بأصفر البيض



و زينتها بحبة مفضضة ووضعتها فلاطة الفرن مفرشاها بورق سولفيريزي واستمريت بنفس العملية مع تغيير لون الوردة حتى كملت الكمية لي بغيت.



2)
القبعة / le chapeau
بنفس الكأس الصغير السابق عملت دوائر من العجين وضعت وسطها كرة صغيرة من عجين اللوز



ودهنتها بأصفر البيض من الجوانب



ثم غطيتها بدائرة عجين أخرى ضغطت على الجوانب و عاودت قطعتها بدائرة أصغر ولكن مشنفة من الجناب نقشتها بنفس النتاف حتى حصلت على شكل قبعة زينتها بشرائط وورود صغيرة من العجين الملون لصقتهم بأصفر البيض طبعا و لصقت فوق كل وردة حبيبة مفضضة و وضعتهم فلاطة مفرشة أيضا بورق سولفيريزي

3)
المعينات الموردة /les losanges fleuris

عملت حرابل من عقدة اللوز و ضعتها فطرف شريط من العجين دهنت طرفو بأصفر البيض



ثم لفيتو على عقدة اللوز ثم ضغطت عليه قليلا بيدي حتى انبسط و قطعتو معينات دهنتها بأصفر البيض و زينتها بعريشات من العجين الأخضر ووريدات من العجين الأحمر+ الأبيض = عطاني وردي و لصقت فوقهم حبيبات مفضضة دائما بمساعدة أصفر البيض ووضعتهم كالسابق فلاطة الفرن مفرشة بورق سولفيريزي سخنت الفرن على 180 درجة لمدة ربع ساعة و دخلت الحلوة تطيب لمدة ربع ساعة أخرى تقريبا و مني خرجتها وضعتها فالعسل و هي مازالة سخونة صفيتها و قدمتها بالصحة و الراحة





لا تنسوني و أهل بيتي من صالح دعائكم رجاء





ثلاث أنواع من الكاشير من مطبخي بالتفاصيل




المقادير الأساسية

250g صدر الدجاج مقطعة مكعبات
8 بيضات



كاس زيت الزيتون120ml



كاس طحين120ml

4 قطع جبن كريمي( لافاش كيري مثلا) أو ما يعادلها

ملح

وضعت العناصركلها فالخلاط و طحنتها جيدا نقصت منها قياس كاس كبير احتفظت به جانبا ثم قسمت ما تبقى إلى قسمين :القسم الأول

مورتديللا بالزيتون

مع كمية الخليط الأساسي لي وضحت وفنفس الخلاط ضفت

قياس ملعقة صغيرة معدنوس مقطع مع الثومة (كنت مقطعاهم بزوج و محتفظة بهم فالمجمد)



ملعقة صغيرة و نصف هريسة



1/2 ملعقة صغيرة كمون + 1/2 ملعقة صغيرة قسبور يابس مدقوق



ملون أحمر (اختياري)

طحنتهم جيدا حتى اندمجو و خلطت معاه دوائر زيتون أخضر

جبت علبة بلاستيك دهنتها بالزيت و صبيت فيها الخليط



القسم الثاني

لانشون دجاج

القسم الثاني من الخليط

بصلة صغيرة



كاس شابلير



ملون أحمر (اختياري)

توابل+ قرفة +سكين جبير +قرنفل و بسيبيسة (حيت ما كانش عندي الكوزة)


و طحنتهم جيدا حتى تنيلو



و ضفت عليهم بعض الحبات من لبزار الأبيض الأسود و حاولت غير نكسرهم فقط

قطعت البصل ووضعتو فطحانة الكفتة



صبيت فوقو الخليط و طحنتهم جيدا مع بعض



ثم ضفت لاشابلير+ التوابل و الملون الغذائي (اختياري)



و طحنت الخليط حتى انسجم



ووضعت الخليط فإناء بلاستيكي آخر مدهون بالزيت


الكأس الأول لي احتفظت به

كاشير للأطفال

طحنت معاه شوية ديال البصل و الجزر و شابلير و القرفة فقط



و صبيتو أيضا فإناء بلاستيك مدهون بالزيت

و عملت الكل يتبخر فكسكاس



لمدة ساعة تقريبا لما خرجو خليتهم يبردو

زولت لهم الغطاء

وفكيتهم من القوالب و دخلتهم للثلاجة وخليتهم ليلة كاملة و فالغد قطعتهم و قدمتهم



عن قرب




بالصحة و الراحة


لا تنسوني و أهل بيتي من صالح دعائكم بظهر الغيب