الخميس، 30 ديسمبر 2010

خلية ورود كاروهات

 
كيف دايرين أالبنات? إن شاء الله تكونو بخير جربت مؤخرا واحد العجين روووووعة, و أكثر حاجة عجباتني فيه أنه ما تاتجيش فيه النسمة ديال الخميرة واضحة زيادة طبعا على نعومته و رائحة الزبدة اللي تتجي فيه. صاوبت به البيتزا جات من شغل يديكم و بقى لي نصف العجين اللي كنت متعودة إما نصاوب به لولدي كرواصون معمر بالخضر و الجبن و الكفتة (شي نهار نقدمهم لكم إن شاء الله) حيت ولى باغي ياكل بيدو قالك ههههه إما تندير بهم الدوناتس أو شي حاجة حلوة.
اليوم جاتني واحد الفكرة و طبقتها, آآآآآآآجيو معاي تكتشفوها باش تقولو لي رأيكم فيها (ملاحظة يمكن استعمال عجين العشردقائق أو أي عجين تعتمدينه في معجناتك )
نبداو على بركة الله

المقادير

العجين( اللي استعملت غير النصف ديالو كيفما قلت لكم و طبعا ممكن الإحتفاظ بالفائض منو فالمجمد حتى نحتاجوه و نخرجوه بفترة قبل الإستعمال)

-5 كيسان طحين(250ml)
- نصف كاس زيت
- نصف كاس حليب غبرة
- ملعقتين كبار خميرة الخبز الفورية/اليابسة
-ملعقتين كبار سكر أو حسب الذوق.
- ملعقة صغيرة ملح
- يوغورت طبيعي بلا سكر القدر الكافي باش نجمعو العجين تقريبا2 كيسان عامرين فحال اللي عبرنا بهم الطحين و الحليب غبرة و الزيت.
-ثلاث ملاعق كبيرة تقريبا من بودرة الكاكاو أو حسب الذوق.

الحشوة

جبن كيري مثلا و قطع شكلاطة أنا كانت عندي البيضاء و استعملتها


الطريقة

-خلطت الطحين مع الحليب غبرة و الزيت و خدمتهم بطراف الأصابع شوية ثم ضفت باقي المقادير و جمعت العجينة باليوغورت( إلا تقاضى تقدري تكملي بالحليب أو الماء و لكن سر هاد العجين فاليوغورت).
- دلكتها مزيان شي خمس دقائق
-قسمتها على نصفين نصف صاوبت به بيتزا
- و نصف حتى هو قسمتو على نصفين
- نصف خليتو عادي و
-النصف الآخر زدت عليه بودرة الكاكاو
- غطيتهم و خليتهم ترتاحو نصف ساعة.
-بمساعدة الزيت عملت منهم كويرات صغار بحجم مشماشة مثلا (أو حسب الحجم اللي بغينا)
- بسطت كل كرة ووضعت فوسطها الحشوة اللي اختاريت العجين الأبيض استعملت الجبن و للبني استعملت الشكلاطة البيضاء

نخليكم مع الصور لتوضيح المراحل أكثر








رصيتهم فلاطة مربعة مدهونة بالزيت مخالفين على هاد الشكل



خليتهم يرتاحو ربع ساعة و دخلت اللاطة لفرن مسخن على180 درجة لمدة35 دقيقة تقريبا.

هاهو الشكل النهائي






و هذا سقيتو بشوية ديال العسل و رشيت الوريدات البويض بجلجلان أسود (متوفر هنا )و البنيين بالجلجلان العادي.




هادي فكرة نقدرو نزينو بها موائد حفلات نجاح وليداتنا ربي يحفظهم و يصلحهم وينجحهم يا رب
بالصحة و الراحة و النجاح لكل وليدات المسلمين يا رب آآآآآميييين .


لا تنسوني و أهل بيتي من صالح دعواتكم.



ليست هناك تعليقات:

إرسال تعليق