الخميس، 30 ديسمبر، 2010

الطحال معمر مبخر و محمر بطريقتي و من مطبخي كالعادة طبعا بالصور


أولا بغيت غير نفسر لكم أخواتي أننا هنا مني تنبغيو نشريو اللحم الحلال تنديرو طلب لأي محل متخصص فالحلال و أغلبهم تيكونو بعاد علينا شوية (طوكيو) بعض هاذ المحلات تيكون عندهم موقع خاص تنشريو من خلاله والبعض الآخر عبر الهاتف أو الفاكس. مؤخرا عملنا واحد الطلب من عند واحد المحل لقينا عندو الطحااااااال ديااااااال البكريييييي وااااااو كانت مفاجأة لنا و فرحة كبيرة. طبعا اللحوم كلها تتجي مجمدة و تنوضعوها مباشرة فالمجمد و ما تنخرجوها إلا باش نطبخوها. و حتى أنا فحال أغلب السيدات مني تيبغي مول الدار ماشي لي كاري لنا لا أبو آدم يخرج للشغل تنسولو آشنو تبغي تاكول فالغذاء و نفس السؤال بالنسبة للعشاء طبعا البارح قالي عمري لينا هاداك الطحال و خرج.
طبعا هي لي ما تعاودش خرجت الطحاااااال و الكفتة من المجمد و بديت تنوجد فالمواد اللي غادية تخصني المهم فتحت كيس الكفتة كلشي فأمان الله فتحت كيس الطحال وانا نتصدم لقيتهم مقطعينو طراف صغيرة ههههههه هي والو هههه المهم بقيت تنبقشش حتى لقيت واحد الطريف هو لي بان لي يصلح للتعمار وبديت تنوجد الحشوة على حسابو

أنا حكيت ليكم هاد الحكاية
- أولا باش تعرفو معاناتنا برة بلادنا
- ثانيا باش نقول لكم بلي واخا يبان ليكم صغيور راه دياااال البكري هههه
-ثالثا حتى لأخير و نقولها لكم

و دابا نبداو على بركة الله
خديت الكفتة + الملح + البصلة + الثومة + قزبور و معدنوس+ كمون + تحميرة + إبزار + سكين جبير+ بيضة + شابلير/ بقسماط + مطيشة الحك.

و درت كلشي فالطحانة الكربائية حتى تخلطو و تطحنو مزيان جمعتهم و وضعتهم فإناء



وزدت عليهم شوية الفلفلة + الزيتون أخضر + الحامض مصير مقطعين مكعبات صغيرة + شوية الروز إلا كنت غادية تقدمي معه الخبز الروز بلاش أنا ضفتو حيت كنت موجداه غيرللعشا و ما حطيتش معاه الخبز


و الآآآآآآن مع نجم السهرة مولاي السلطان ههههه هنا كنت فتحتو



هنا عمرتو بالحشوة لي وجدت



  خيطتو
و فرشت لو البصلة مشلضة فالكسكاس و غطيتو وخليتو يفور
تفكرت أني ما ثقبتوش فتحت عليه و ثقبتو بسكين رقيق و عاودت غطيت عليه و خليتو يفور ثلث ساعة تقريبا
فاش بغيت نوضعو فالمول ديال الفرن مدهون بالزيت لقيت هاد شي خارج من الثقيبات

نظفتهم بالشوكة مزيان و حطيتو فإناء الفرن و دهنتو بالزيت و دخلتو يتحمر على درجة حرارة عالية باش يتحمر غير من برى و ما ينشفش


ها العريس خارج مزنك من الحمام هههه آنسيت محمر من الفران


هاهو العريس بارز فالعمارية هههه آنسيت الطحال مقطع فصحن التقديم




  بالصحة و الراحة
و ما تنساونيش أنا و أهلي من صالح دعواتكم
إيه حقا كنت غاديا ننسى ثالثا ههههه

- ثالثا باش لي عندها شي فكرة آشنو نقدر ندير بهادوك الطريفات ديال الطحال لي ما يصلاحوش للتعمار الله يجازيها بالخير هي و أهل بيتها تفيدنا بها جميع و شكرا



ليست هناك تعليقات:

إرسال تعليق