قررت اليوم نجرب المخابز الجزائرية، و بحثت فالنت على الوصفة ديالها، و حاولت نطبقها، ولكن...المهم آجيو تكتشفو معاي التجربة ديالي
حضرت السكر الصقيل مخلط مع النشا و قسمتهم فأكياس على حسب الألوان لي اخترت نستعملهم و النكهات كان عندي الفاني و نكهة الحامض و نكهة اللوز قطرات الحامض واخا مامصورش أما بالنسبة للجيلاتين الحلال فماكانش متوفر عندي عوضتو بجيلي مختلف الألوان و النكهات
ذوبت الجيلي مع ملعقة صغيرة ماء و النكهة و اللون المناسب
و جمعت به السكر و النشا و الألوان و قطرة ديال عصير الحامض
و سديت عليهم فأكياس و احتفظت بهم لمدة يومين و عاودت عجنتهم كل لون على حدة و استعملتهم
طحنت اللوز مصلوق مع ماء زهر و نكهة اللوزحتى حصلت على بودرة
كان عندي شي أبيض بيض فالثلاجة مابقيتش عاقلة واش ديال ثلاثة أو أربع بيضات كنت استعملت الأصفر ديالهم فالصباح خويتهم فوق بودرة اللوز حسيت بالعجين شوية جاري بغيت نجمعو كنت شوية زربانة استعملت الدقيق باش نجمعو طلقت العجين بمساعدة الزيت و قطعتو دوائر و مثلثات و مربعات من نفس الحجم و دخلتو للفرن حتى تحمرو شوية من لتحت مني خرجتهم حسيت بهم قاسحين أكثر من اللازم
تصدمت ....و لكن ما يأشتش... ما يأستس ... ماااا يأسسسستتتتتشششش ههههه
... لا يأس مع الحلويات و لا حلويات مع اليأس.. وقررت نكمل نفس الوصفة 
و لكن مع تغيير الطريقة
:خفضت درجة حرارة الفرن ل150 درجة و دخلتهم حتى تحمرو نسبيا كبرها تصغار هههه خرجتهم و طحنتهم ثااااااني
مع الزبدة مذوبة و الحليب (ماتسولونيش شحال راني كنت خارج التغطية هاديك الساعة)
لي جمعوهم بالحق هاد المرة على شكل عجين عادي طلقتو تااااني
و قطعتو تااااااني دواااااائر و مربعااااااات و مثلثاااات 
من نفس الحجم تقريبا و احتفظت بجزء منو قدر 3 حرابل متوسطين سمحو لي ألبنات ما صورتش المراحل حيت كنت على أعصااااابي
و دابا ندوزو للمونطاج
1)المخابز
خديت كرة من الباستياج و طلقتها بمساعدة شوية ديال الزيت
حطيت وسطها دائرة الحشوة
طلعت الجوانب
قطعت الفائض وهزيتها بشوية بمساعدة السكين و عاودت قاديتها بيدي و حطيتها فكاغيط الحلوة
زوقتها بعريشات من الباستياج الأخضرو بوريدات من الباستياج الوردي و زينتها بحبة فضية
تبعت نفس العملية بالنسبة للمثلثات
و المربعات مع تغيير الأوان طبعا
نظرا لارتفاع درجة الحرارة ونسبة الرطوبة عالية في موسم الأمطار هنا باليابان ذابو لي شوية و لكن مني دخلتهم للثلاجة تجمعو و عاودت قاديتهم بيدي و غيرت لهم الكاغيط ديال الحلوة
2) باط داموند
أخذت زوج حرابل عملت بهم حلوة عجين اللوز/ gateau la pate d`amande
3) بسكوت لولبي /The roll biscuits
أخذت شوية من الحشوة شكلتو هو و الباستياج على شكل حرابل من نفس الحجم
طلقتهم بمساعدة النشا وسط زوج بلاستيكات ووضعت الحشوة بين طبقتي الباستياج
و لفيتهم و قطعتهم
واضطريت نلصق كل زوج بجانب بعض حيت خرجو لي شوية صغار
4) قليبات ملونة
دخلتهم للفرن حتى طابو و مني خرجتهم و بردو بقى لي شوية من الباستياج خففتوغير شوية ببضع قطرات من السيرو حتى اصبح على شكل كلاصاج و غطست فيه وجه بسكوت على شكل قليبات و دخلتهم للثلاجة حتى يبس الكلاصاج
وأخيييييييرا
لا تنسوني و أهل بيتي من دعواتكم الصالحة
ليست هناك تعليقات:
إرسال تعليق