لازانيا صناعة منزلية 100x100

المقادير ل2 لازانيات

4 بيضات ملح الطحين اللي يجمع البيض العجين عادي شوية قاسح على ديال الخبز(بالسميدة الرقيقة تتجي أفضل)

الصلصة الحمراء/ البولونيز

2 علب طماطم فحال هادي 2بصلات كبار محكوكين رقاق 4ثومات محكوكين 3أوراق سيدنا موسى ملح إبزار شوية الملون الإصطناعي/ تصفيرة /زيت الزيتون/ رابعة الكفتة/معجون الطماطم/ القسبور و المعدنوس تنقطعهم دائما مع الثوم و تنحتفظ بهم فالمجمد

البيشاميل

8 ملاعق زبدة 8ملاعق طحين ملح كوزة 1لتر حليب 1كاس قشدة طرية شوية الملح
500فروماج البيتزا

الطريقة

العجين

جمعت العناصر

حتى حصلت على عجين أقسح شوية من ديال الخبز 

عملت منو كويرات

درت الماء و شوية الملح فطنجرة فوق النار،ووجدت حوض صغير فيه الماء بارد و بديت تنطلق العجين بآلة المعجنات (لي رسلاتها لي أختي أمل أم ريان&مهدي من إيطاليا هدية الله يجعلها من سيدات الفردوس ) على رقم  6و هاد العملية نقدرو نديروها طبعا غير بالمدلك إيلا ماعنداش الآلة

و قطعتها بالجرارة على شكل مستطيلات

ومني غلى الماء بديت تنحط فيهم وحدة وحدة شي دقيقة واحدة تقريبا حتى تيتفتح اللون ديالهم شوية المهم ماتاياخدوش بزاف ديال الوقت باش يتصلقو

و تنديرهم فحوض الماء بارد،و تنصفيهم

الصلصة الحمراء/ البولونيز
درت الزيت فالمقلاة حتى سخن شوية و زدت عليه البصلة حتى تشحرت شوية 

 زدت الكفتة حتى تشحرت  

خليتهم حتى نشفوا من الماء زدت الثوم+أوراق سيدنا موسى

زدت طماطم فحال هادي

بعد ما طحنتها فالخلاط +ملح+ إبزار +شوية الملون الإصطناعي/ تصفيرة

مني ثقالت الصلصة

زدت شوية القسبور و المعدنوس +الثوم +معجون الطماطم.

البيشاميل

ذوبت الزبدة 

  حمرت فيها الطحين شوية 

وزدت الحليب و الملح  ثم الكوزة

بقيت تنحرك حتى ثقالت لا صوص بيشاميل زدت عليها القشدة الطرية

حركت خليتها 2دقائق و طفيت عليها النار

المونطاج

فإناء الفرن درت البيشاميل ثم غطيتها باللازانيا ثم صلصة الطاطم ثم الفروماج ثم البيشاميل (الصورة فقط لتوضيح الخطوات من اليسار إلى اليمين

وكررت العملية طبقة ثانية لازانيا ثم صلصة الطاطم ثم الفروماج قلت نصورها لكم باش نوضح أن الطريفات لي مامقادينش يمكن لهم يترتبوا فالطبقة الوسطى بهاد الشكل
 

ثم طبقة ثالثة غطيتها بالبيشاميل، و رسمت خطوط بمعجون الطماطم فوقها

تيتباعوا هنا ساشيات ديال معجون الطماطم فحال هادوا قطعت الجنب ديالو بالمقص و هو لي زوقت به

 

و بطرف سكين عملت زواقة الميلفوي
 

و دخلتها للفرن على 200درجة مدة 45دقيقة تقريبا حتى طابت و طلعتها لفوق حتى تحمرت و قدمتها

للتذكير هاد المقادير خرجوا لي 2 فحال هادي يعني لعمل واحدة نصف المقادير كافية

اللهم أدمها نعمة و بارك لنا فيها و احفظها من الزوال

لا تنسوني و أهل بيتي من صالح دعواتكم